İstehsalat praktikası proqramı

“SOCAR Polymer”in yay təcrübə proqramı tələbələrə öz nəzəri biliklərini praktikada tətbiq etmək, ünsiyyət bacarıqlarını artırmaq və liderlik keyfiyyətlərini inkişaf etdirməyə imkan verir. 2016-cı ildə ilk dəfə təşkil edilmiş yay təcrübə proqramında iştirak etmək üçün verilən ərizələrin sayı dəfələrlə artmış və onlarla tələbə təcrübəçi adını qazanmışdır.

Seçim mərhələsindən uğurla keçmiş namizədlər 8 həftə ərzində şirkətin proses və prosedurlarını öyrənir, yeni bilik və bacarıqlar əldə edir və korporativ fəaliyyətdə iştirak edirlər. Proqramın əvvəlində şirkətlə tanışlıq təlimlərindən sonra təcrübəçilər “SOCAR Polymer” şirkətinin ofis və zavodunda işləmək üçün müxtəlif konkret layihələr üzərində işləyən kollektivlərinə qoşulurlar.

“SOCAR Polymer”də təcrübəçi olmaq üçün namizəd bir və ya iki təcrübə sahəsi seçərək aşağıdakı göstərişlərə uyğun olaraq onlayn ərizə forması doldurur. Yay təcrübə proqramında Azərbaycan Respublikası vətəndaşı olan bakalavr pilləsinin son kursunda və ya magistraturada təhsil alan tələbələrin iştirak etmək hüququ var. 

Ərizələrin onlayn rejimdə təqdim edilməsi

Namizəd maraq və peşəkar inkişaf istiqamətinizə cavab verən əsas sahəni seçir. Onlayn rejimdə doldurulan ərizəsinə universitet tərəfindən təqdim olunan transkript və CV-sini əlavə edir. Proses təqribən 30 dəqiqə çəkir. Qeyd etmək lazımdır ki, yalnız bütün xanaları doldurulmuş və tələb olunan sənədlər əlavə olunmuş ərizələr qiymətləndirilir. Doldurulmuş formanı göndərdikdən sonra namizədlər elektron poçt vasitəsi ilə ərizələrinin baxılmaq üçün qəbul edildiyi barədə bildiriş alırlar.

Növbəti mərhələlər

İngilis dili imtahanı: Proqramın tələblərinə uyğunluq yoxlamasından keçdikdən sonra namizəd ingilis dili biliklərinin səviyyəsini müəyyən etmək məqsədi ilə imtahan verməyə dəvət olunur. 

Məntiqi təfəkkür imtahanı: İngilis dili imtahanından uğurla keçmiş namizəd məntiqi təfəkkür imtahanına dəvət olunur.

Müsahibə:  Daha sonra namizəd onlayn və ya canlı müsahibəyə dəvət olunur. Həmin müsahibədə namizədə həm seçdiyi vəzifə/ixtisas üzrə bacarıq səviyyəsini yoxlamaq üçün konkret texniki suallar, həm də kollektivdə çalışmaq qabiliyyətini və “SOCAR Polymer” şirkətinin tələblərinə uyğunluğunu müəyyən etmək üçün suallar verilir.

Təklif: Nəhayət, yoxlamanı uğurla keçən namizədlər Təcrübə Proqramında iştirak etmək üçün dəvət alırlar. 

Qeyd: Ərizə formasında aktiv olmayan telefon nömrələri qeyd edilməməli və elektron poçt ünvanlarının yazılışında orfoqrafik səhvlərə yol verilməməlidir! Ərizə formasını doldurarkən namizəd müvafiq xanalara ən son məlumatları yazdığından əmin olmalıdır. 

Qeyd: “SOCAR Polymer” şirkətində təcrübə keçmək istəyən gənc mütəxəssislərin seçimi prosesində meyarlardan biri ingilis dilində sərbəst anlaşmaq, yazmaq və oxumaq qabiliyyəti olduğuna görə, aşağıdakı cədvəldə təcrübə sahələrinin təsviri ingilis dilində təqdim edilmişdir.